వేపతో పూత వేద్దామా!

వేపతో పూత వేద్దామా!

ముఖాన్ని మెరిపించేందుకూ.. మొటిమలూ, మచ్చల్లాంటివి కనిపించకుండా చేసేందుకు రకరకాల పూతలు ప్రయత్నిస్తుంటాం కదా.. ఈసారి వేపను కూడా వాడి చూడండి. ఎందుకు అంటారా..

* వేపాకుల్లో యాంటీబ్యాక్టీరియల్‌ గుణాలు ఎక్కువ. స్నానం చేసే నీటిలో గుప్పెడు వేపాకుల్ని వేసి మరిగించండి. ఆ నీటితో స్నానం చేస్తే శరీరం నుంచి చెమట వాసన రాదు. మోచేతులూ, మెడా, మోకాళ్ల దగ్గరుండే బ్యాక్టీరియానూ నాశనం చేస్తుంది వేప.
* చెంచా వేపాకుల ముద్దలో కొద్దిగా పసుపు కలపాలి. దీన్ని ముఖానికి రాసి.. బాగా ఆరిపోయాక కడిగేయాలి. ఇలా వారంలో రెండుసార్లు చేస్తే.. చర్మం మృదువుగా, ఆరోగ్యంగా మారడమే కాదు మచ్చల్లాంటివీ పోతాయి.
* ఎన్ని జాగ్రత్తలు తీసుకున్నా... ముఖం జిడ్డుగా కనిపిస్తోందా. రెండుచెంచాల వేపాకులపొడిలో కొద్దిగా నిమ్మరసం, పెరుగూ కలిపి ముఖానికి రాసుకోండి. పదినిమిషాలయ్యాక కడిగేయండి. ఈ పూత ముఖంలోని అధిక జిడ్డును నివారిస్తుంది.
* మెరిసే చర్మం సొంతం కావాలంటే.. చెంచా వేపాకులపొడిలో కొద్దిగా గులాబీపొడీ, పెరుగూ, పాలూ కలిపి పూతలా తయారుచేసుకుని ముఖానికి రాసుకోవాలి. పదిహేను నిమిషాల తరవాత గోరువెచ్చని నీళ్లతో కడిగేయాలి.
* గిన్నెలో సగం వరకూ నీళ్లు తీసుకుని అందులో గుప్పెడు వేపాకుల్ని వేసి పొయ్యిమీద పెట్టండి. నీళ్లు మరిగి, ఆకులు రంగుమారాక దింపేయాలి. ఈ నీటిని చల్లార్చి వడకట్టి ఓ సీసాలోకి తీసుకుంటే సహజ టోనర్‌ తయారైనట్లే. ఇందులో దూదిని ముంచి.. ముఖం తుడుచుకుంటే మొటిమలూ, వాటి తాలూకూ మచ్చలూ దూరమవుతాయి.